رسالتى

لكل منا شخصيه يحترمها ويحبها ... ولا يضعها فى مرتبة البشر ... شخصيا قد لا تكون قابلته من قبل - او مر عليكما سويا اوقات كنت تظن انها من اجمل اوقات حياتك - وفى نفس الوقت تقدره ... وتعتبر كل حكاية عنه بمثابة حكاية اسطورية ... وقد رسمت فى مخيلتك صورة ملائكية له ... انها اكثر الشخصيات المؤثرة فى حياتك ... لكن ما يلبث كل ذلك ان يتحطم عندما تقابلك تلك الشخصية بذلك الجفاء ... وتسال نفسك اهذا من كنت تحلم بلقائه؟!! اهذا من كنت تحلم به فى يقظتك؟!! اهذا من قدرته مسبقا؟!! اهذا من تمنيت رضاه عنك؟!! وتضعك الظروف فى لقاء اخر معه ... واذا به يحاول ان يحطم كل احلامك وامالك براى هادم فى شخصك ... ستدرك انه ما هو الا واحد من هؤلاء البشر العاديين الذين ربما تحبهم او تكرههم ... وقتها فقط ستدرك انه لا يوجد مخلوق يستحق ان يعلو فوق مرتبة البشر ... فجميعهم سواء بشر يخطئون ... يرون الاحداث من منظور من حولهم ... فلقد لغوا اهم واسمى شئ فى الوجود من حياتهم ... لغوا استخدام عقلهم واستخدموا عقول الاخرين ... هذا اذا كان الاخرين يستخدمون عقولهم من الاساس ... ومن هنا قررت قرارا نهائيا ... الا اسمو باحدهم بعد اليوم ... والا اعتبر احدهم اعلى شأنا من الاخر ... حتى وان كان يمتلك اسرار الخلود فسحقا للخلود مع الغباء ... وسحقا للخلود مع التعجرف ... ولتحيا حياتى كما هى بلا تغيير ... ومرحبا لمن يريدنى على سجيتى ... اما من يريد اى تغيير فى حياتى ... فسحقا له فانا من لا اريدك فى حياتى نهائيا فلترحل منها بلا رجعه ولاعودة.

* لم اجد رساله اروع منها لارسلها للجميع فقد اقتبست اجزاء منها من مسلسل الجامعه مع بعض التعديلات الشخصية وهذا فقط للامانه الادبية

انا وهم

اليوم هو اول ايامى داخل المعتقل ... المعتقل هو ذلك المكان الواسع المحاط بسور شاهق الارتفاع قد يصل الى ارتفاع ثلاثة ادوار وفوقه سور اخر من السلك لا اعلم حتى الان سبب وجوده ويوجد به ثلاثة انواع من البشر

النوع الاول يرتدى اللون الكحلى ويطلق عليهم المساجين

النوع الثانى يرتدى اللون البيج ويطلق عليهم السجانين

النوع الثالث يرتدى اللون الابيض ولهم اسمان عند المساجين اسمهم بتوع السياسة وعند السجانين اسمهم اعداء الوطن

انا بقى كنت من اعداء الوطن مش عارف ازاى مع انى والله بحب بلدى وباموت فى ترابها بس اعمل ايه النظام عندنا حريص شوية واى حد يقول له لا يبقى عدوه وبما ان النظام والوطن اصدقاء وعدو صديقى يبقى عدوى يبقى انا كده عدو الوطن

المهم اكيد فى ناس بتسال انا مين

مش مهم انا مين

حط الاسم والسن اللى يعجبك مش هاتفرق

قدك او اكبر منك او احتمال فى سنك مفيش مشاكل

مسلم ... مسيحى ... بهائى ... يهودى ... ملحد

مفيش اى مشكله

المهم انى مصرى ودا بالنسبة لى كفاية

زمان كنت بحب البلد دى اوى وكنت ماشى فى حالبى وبحب الريس على اعتبار ان هو اللى حارب فى 73 بقى وكنت احب اسمع اختارناه

والعزبى لما كان بيقول لا مغدنى ولا معشينى ولا فى مصلحة بينه وبينى

والشغل دا كله

كنت معتقد ان الحكومة لازم تبقى صح وما بتغلطش

لغاية ما بدات اقرا وافهم

فهمت يعنى ايه نظام ديكتاتور

فهمت يعنى ايه نظام غبى واهبل

كل ما واحد يقول له لا يروح راميه فى المعتقل

مع ان اللى شفته ان اللى بيدخل المعتقل قلبه بيجمد عن الاول او بمعنى اصح بيستبيع

بلدى ... عروسة وبهية ... غنية وجميلة ... وفيها سياحة ... وصناعه وتجارة ... وتعليم زباله ... وهدم الشوارع ... وحرق البيوت ... وغلوا الحديد ... ورفعوا السولار ... ويوم ما نلقى سكر ... بيبقى سعره نار ... وشايف فى زاوية ... شبابك دى واقفة ... تشوف اللى رابح ... تعاكس اللى جاى ... واخر المتمة ... يقولوا البلد دى ... لازمها طوارئ ... لاجل الحياة

معلش سرحت شوية منكم ... هنا بقى فى المعتقل قابلت مين ؟!!!!

تعالوا نشوف سوا

الشخصية الاولى

يدعى س.ج سنة يتجاوز الستون ذو شعر ابيض كثيف وغير مرتب ... نحيل الجسم ... لا يحتوى على اى لحم او عضلات بجسمه فقط عظام وجلد

كل حديثه عن الطبقة العاملة والثورات العمالية فى العالم ودائما مايدخل مصطلحات غير مفهومة فى كلامه الذى لا افهمه غالبا

وبينما نتحدث يدعونى الى الطعام الذى اشك فى الاغلب انه فول وطعميه ولكنى اجد من الارز بالجمبرى والاسما كميات خرافيه

ينظر الى مبتسما وهو يقول الرفاق بره باعتين لى الاكل دا

اساله : هو المعتقل مابيجيبش اكل؟؟؟

يرد : اكل ايه يا عم ... انت عاوزنى اكل زى باقى الناس!!!!!

الشخصية الثانية

قيادى فى احدى الحركات الاسلامية المحظورة من قبل النظام

يدعونى الى زنزانته للتعارف

ادخل زنزانته وكاننى انتقلت من المعتقل الصحراوى الى احدى المنتجعات السياحية بباريس

التكييف الذى يعمل على تلطيف الجو

سرير حريرى ووسادة ريش نعام

طاقم انتريه مدهب سعره يكفى لحل ازمة نحو عشرون شاب من حديثى التخرج

ثلاجة صغيره بها ما لذ وطاب من العصائر والمشروبات

جهاز الكمبيوتر المحمول

تليفزيون

يبدا حديثة بالاستدلال بايات القران والاحاديث ويكلمنى عن ضرورة اتباع منهج الله وسنة نبيه

انظر حولى فى استغراب ... كيف اتت تلك الاشياء الى هنا ... يخرج هذا التساؤل منى دون ان ادرى

ينظر الى بابتسامة عريضة قائلا:- الفلوس بتعمل كل حاجة !!!!

الشخصية الثالثة

هو احد افراد حزب نشا قبل قيام الثورة او الانقلاب العسكر بنحو ثلاثون عاما او يزيد قليلا

يرتدى بدلة كاملة بيضاء اللون ابتداء من الحزاء وحتى الجرافت

نتمشى سويا فى الساحة امام الزنازين ... يتحدث عن الثورة وكيف قامت بتغيير رئيس الوزراء ... واعادت الزملاء من المنفى ... يطالب دوما بالحرية من اجل كل شئ ولكل شئ

اقول له بس الحرية لها حدود

يصرخ لا

الحرية مطلقة

ويدور بيننا جدل حول مفهوم الحرية

اكتفى اليوم من مقابلة الشخصيات فقد نلت كفايتى

وفى قرارة نفسى شئ واحد

سحقا للنخبوية الفاشلة والمعارضة الزائفة

انا مجنون

قديما كانت كلمة مجنون هى سباب للفرد المختلف عمن حوله حيث انه قديما كانت هناك العادات والتقاليد التى تحكم البشر ولا يجوز الخروج عنها نهائيا ومن يختلف عن تلك العادات فهو مجنون

اما الان الجنون اصبح احدى لزمات الحياة

فيجب عليك ان تصبح مجنون كى تستطيع الحياة

لا يوجد عاقل يستطيع ان يهب كل مايملك لفتاه ويتزوجها لتسلبه ما تبقى فى حياته

لا يوجد عاقل يستطيع ان يسخر طاقته من اجل خدمه رؤسائه فى العمل

لا يوجد عاقل واحد يستطيع ان يلعب مباراه ملاكمه ويشوه وجهه من اجل ان يفوز بميداليه

لا يوجد عاقل واحد يرى مايحدث من نهب لثروات البلد ويظل صامت

الان انا اعلنها وبكل ماتبقى من قواى العقلية ان وجدت

انا مجنون

فانا افعل ما اريد فى اى وقت دونما تفكير

احيا بطريقتى

واسير اينما اريد

اقرا ما اريده

العب متى اشاء

انها حياتى

وجدت من اجل اسعادى انا وليس لاسعاد الاخرين

اعلم ان الكثيرين سيلوموننى على ما افعل

ولكن سحقا لهم كما قلت فحياتى ملك لى وحدى

اذا استعمل الانسان عقله وفكر فى كل شئ فلن يتحرك قيد انمله من موقعه

فكل شئ وجد له سلبيات وبالتالى سوف تخشى من ان تفعل ما تريد

ولذلك

فانا ارفض الوصاية والحجر من الاخرين على حياتى وساعيش كما اريد وليس كما تريدون

ولذلك لا ترهق عقلك فى التفكير كثيرا حتى لا ينتهى عمره الافتراضى مبكرا

فلتحيا حياة الجنون وسحقاً للتفكير

انا وعاطف

زمان وانا صغير ... كان ليا صاحب اسمه عاطف ... البيتين لازقين فى بعض ... كنا بنلعب دايما سوا

اطفال صغار ... انا وعاطف كنا فى نفس المدرسة ... نفس الفصل ... قعدنا جمب بعض

الدرس واحد

الفصل واحد

الشكل واحد

نفس المكان

نفس الزمان

نلعب سوا

نفرح سوا

نخرج سوا

نحزن سوا

اعيادنا واحده

مفيش فروق

كنت دايما اسال امى ... ليه يا ماما احنا اللى بنودى الكحك لعاطف فى العيد وهما بيجيبوا حلويات فى ايام تانية

ردى امى ببساطة الست المصرية ... يا حبيبى مش كل الناس بتحتفل بالعيد سوا يعنى مثلا عيد ميلادك مش بيحتفل بيه الا اللى مولودين فى نفس اليوم

فهمها عقل يدوب دا كان سبع سنين

او طنشها علشان مش عاوز يفكر ... او مش عاوز يفرق

فى المدرسة كان عندنا حصة دين ... كان دايما عاطف وكريم ومينا مش بيحضروها معانا ... سالت امى ... ليه يا ماما ... بصت لى ماما وقالت ... احنا مسلمين وهما مسيحين .. دا دين ودا دين

قلت لها طيب مين الحلو ومين الوحش

قالت لى مفيش وحش كلنا حلوين يا حبيبى

كلنا بشر ... مفيش فروق

فرحت

هيصت

جريت على عاطف

نزلنا نلعب

عدت سنة

ورا سنة

وانا وعاطف عايشين سوا

ليلة عندى

ليله عنده

والساعات بتفوت هوا

وفى مره جه

مدرس غبى

وقال كلام

غريب اوى

مش فاهمه انا

كل اللى فاكره

انه قال

المسيحين هايدخلوا النار

صرخت فيه

وقلت لا

احنا بشر

مفيش فروق

صح

غلط

بس احنا برضو

فى الاخر بشر

زعق وقال

لا مش بشر

احنا مسلمين

احنا بس اللى هاندخل الجنة

بكيت اوى

عاطف دا صاحبى

صديق حياتى

هايروح النار ليه

احنا كل حاجه بنعملها سوا

نلعب سوا

نغلط سوا

نجرى سوا

دخلت اوضتى

قفلت بابى

بدات اصرخ

ابكى

كله الا عاطف

عاطف صديقى

رفيقى

زميلى

دخلت لى امه

بتبكى ليه

سالها

ايه ذنب عاطف

ردت فى ايه ؟؟؟؟

حكيت لها

كل الحكاية

بصت لى بصة

ماتتوصفش

بصت الم

بصت جفا

بصت بكا

بصت حنين

بصت فرح

ما اعرفش ليه

جمعتهم سوا

وقالت لى يا ابنى

ماتصدقوش

استاذ غبى

جاهل

عنيد

حافظ كلام

بيردده

بيكرره

زى الغراب ... دا وشه اسود

زى الحمار ... حافظ طريقه

والبغبغان ... حافظ كلامه

طب اساله

سؤال بسيط

ايه اتخلق

انسان بدين؟؟؟

ولا اتخلق

انسان ودين ؟؟؟

من إلهك ؟؟

اعلم ان الجميع سيهاجمنى قبل بداية القراءة ولكن بالنسبة لمن قرر المهاجمة قبل ان يقرا فسحقا له لانى لا انتظر رايه فلتذهب الى الجحيم فى حالة وجوده

منذ بداية الخليقة والناس فى مختلف تصنيفاتها ايا كانت (عائلات - قبائل -جماعات- دول - شعوب) كانت دوما تختار احدهم ليسيروا على رايه

فعلى سبيل المثال لا الحصر

كبير العائلة دوما كلامه كالسيف القاطع دون تفكير

شيخ القبيلة بمثابة الرب لقبيلته فهو من يزوج ويطلق ويمنح الاطفال اسمائهم وينقل القبيلة من مكان لاخر ويحل المنازعات

جماعه الاخوان كمثال تعتبر كلام المرشد لهم وكانه القران المنزل لا يستطيعون عدم طاعته بسبب البيعه له على الطاعة بلا تفكير

الروم كانت تعتبر القيصر ايا كان وكانه شخص ممجد فكلامة يجب تنفيذه بدون تفكير ايا كان

والان انت يا قارئى العزيز من هو الهك ؟؟؟

اهو رئيس الدولة ؟؟؟

اهو زعيم من زعماء المعارضة ؟؟؟

ام احد شيوخ الفضائيات ؟؟؟

ام مطرب من مطربى الجيل؟؟؟

ام انك تفوق وبعد طول تفكير اخترت احد الممثلين ؟؟؟

لماذا لا يفكر كل منا بطريقته ؟؟؟

لماذا لا يكون كل فرد هو اله نفسه... أشل تفكيرنا ؟؟؟؟

قديما قال ابوالعلاء المعرى " كل عقل نبى" لماذا لايتبع كل منا نبيه ؟؟؟

لماذا دوما حينما يعجبنا شخص ما فى اسلوبه او كلامه او مظهره نعتبره كالإله المبجل ؟؟؟؟

مجموعه كبيرة من الاسئلة لن نجد لها حلولا فى وقتنا هذا الا اذا اتبع كل منا نبيه سنجد جواب لكل هذه الاسئلة

انا عن نفسى كفرد قررت ان اتبع نبيى

سوف اتخذ بعض الناس كقدوة ولكنى لن اجعلهم الهتى بل سافكر مليا فيما يفعلوه اهو صواب ام خطا وفى حالة اذا اخطأو سانتقدهم بكل صراحة فهم بشر مثلنا ولا يوجد فرد معصوم من الخطا وليس عيبا ان يخطئ أحدنا فلنخطئ كما نريد ولكن الخطأ هو الا نتعلم من أخطائنا

وساكررها مرة اخرى

كل عقل نبيييييييييييييييييييييييييييييي

فاتبع نيييييييييييييييييييييييييييييييييييك

كوباية النسكافيه كلاكيت تانى مرة

وانا قاعد حالا وباشرب كوباية النسكافية لتانى مرة وبرضو باسمع وجيه عزيز
جت فى دماغى حتة فكرة
لالالالالالالا
فكرة جديدة خالص غير الفكرة الاولانية
قلت اقول لكم واهو اخد فيكم ثواب واعرف رايكم
تخيلوا كده لو بقينا دولة ديمقراطية
اه والنعمه بجد ديمقراطية
يعنى مفيش كوسة ولا تزوير
مفيش رئيس مدى الحياة
مفيش حزب واطى
مفيش
مفيش
مفيش
دلوقتى الواحد بيمشى فى الشارع يبص فى وش الناس بيحس انهم هايدوله بالجزمة
صح يا جماعه ولا انا غلط
طبعا صح انا عارف
الناس ماشية قرفانة
لا مش من الريس محدش يغلطنى
هو الريس بتاعنا ادام الله حكمة حد يقدر يغلط فيه ؟؟؟
المهم
سيبونى اكمل الكلمتين بقى مش كل ثانية واحد يطلع لى بتعليق
تخيل كده انك بتتعلم تعليم نضيف
اه والله تعليم نضيف
لا يا عم الظريف مش مغسول ببريل
تعليم نضيف يعنى تعليم يدخل مخك بسهولة
كلام تفهمه وتستعمله بعد ماتتخرج
مش تخش ترشق الكلمتين فى ورقة الاجابة وتخلع
وياسلام لو القوى العامية بتاعتنا عملت عملية وبقت تشوف كويس وتعين كل واحد فى تخصصة
مش تجيب لى مهندس الزراعه وتعينهولى فى ورشة ميكانيكا
لا عادى وربنا بتحصل فى مصر مش غريبة
والواحد يزاكر علشان عارف انه لما يخلص هايشتغل وهايقبض مرتب كويس يعيشة عيشة حلوة مش يقبض 150 جنيه مايكفوش لب للعيال
ونروح ندى صوتنا فى الانتخابات ما احنا عارفين اننا اللى بننجح الراجل دا مش التزوير
ونقول اللى نفسنا فيه ما احنا عارفين ان لو فى ظابط امن دولة غلط احنا اللى ها نعاقبة ما احنا الشعب القوى الاولى فى البلاد
ومفيش امين شرطة يمشى يتنطط على خلق الله
بذمتكم ساعتها هاتلاقى حد مكتئب
بس يا عم الرخم بدل ما اقوم اضربك بالنار
عارف ان هايبقى فى ناس مكتئبة
بس هايبقى بحد اقصى 4% ل 5% ولا ايه ؟؟؟
مش دلوقتى بحد أدنى 100% صح؟
طيب ايه اللى ها يحصل لو فقنا؟؟؟؟
قدامنا سنتين طحن
مجلس شعب وشورى ورئاسة
ماتيلا بينا نجرب
نحط اعضاء مجلس شعب نضاف
عارفينهم
وعارفين انهم هايحققوا لنا الديمقراطية
هاتقول لى هايزوروا
يبقى نقف لهم زى اللقمة فى الزور
نراقب الانتخابات
لما كل لجنة يبقى فيها 3 بيراقبوا الانتخابات
هايحصل تزوير؟؟؟؟
طبعا لا
لاننا لو شدينا معاهم هايخافوا
لاننا فاهمين حقنا
واحنا اللى على حق مش هم
انا شكلى كده ها اقلب بنكد واغم الناس
كفاية طكده علشان ايدى وجعتنى من الكتابة
يلا سى يو ان انزر نوت :-)

رئيسا للجمهورية

وانا قاعد مع نفسى كده وباشرب نسكافية
ومنسجم على الاخر وباسمع وجيه عزيز
جت فى دماغى حتة فكرة قلت اما اخد رايكم فيها
استقل بنفسى واعمل جمهورية مستقلة واسميها (جمهورية عمرو) ايه رايكم
وبما انها جمهورية هاتبقى ديمقراطية بقى
وانتخابات رئاسة
ومجلس شعب
وشورى
ومحليات
ونقابات
و...و....و...
من الاخر يعنى كل حاجه ديمقراطية
و بما انى ها ابقى المواطن الوحيد ها ابقى انا كل حاجه برضو
طيب ماتيجوا نفكر سوا كده
ها افتح باب الترشيح لمنصب رئيس الجمهورية
و انا اللى ها استلم الطلبات طبعا
وبرضو انا اللى ها اترشح
و اخد الملف بتاعى واروح اسلمه ليا برضو
واقعد اراجع على الملف ورق ورق واتلكك على اى غلطة علشان ارفض الملف ليا
و تيجى النتيجة والاقى نفسى مرفوض
واروح اقدم طعن
وها ابقى انا القاضى برضو
و اقبل الطعن
وادخل نفسى الانتخابات بحكم قضائى
و ابدا اماطل فى انى اقبل الملف بحكم العادة بقى والرخامة
و فى الاخر ها اقبله
ويجى يوم التصويت بقى
وبما انى المواطن الوحيد فى الجمهورية
ها ابقى انا المصوت على الانتخابات
والقاضى اللى بيراقب
والشاب بتاع المجتمع المدنى اللى بيبقى معلق الكارنيه دا عارفينه ؟؟؟
وانا الظابط الرخم اللى واقف هناك وبيرخم على خلق الله
و انا المستشار اللى ها يفرز الاصوات
و يعلن انى كسبت
و ابدا امارس السلطات بقى
و ابقى انا الريس
ورئيس الوزرا
والوزرا كلهم
والموظفين
و اهم حاجه
ها ابقى ظابط امن الدولة
و السياسى الوحيد فى البلد
و ابدا بقى استجوب نفسى
وامضى امر اعتقال ليا
وبعد ما اخرج من المعتقل
ابدا اجهز لمظاهرة كبيرة
علشان تعمل انقلاب عليا
و الجيش يسيطر على البلد بقى
عادى ما انا برضو وزير الدفاع
والقائد الاعلى للقوات المسلحة
و اصحى الصبح الاقى دماغى مش رايق
اروح اعمل اعتصام عند النائب العام
اللى هو انا برضو
و اقف كردون امن مركزى حوالين نفسى
وادى لنفسى امر انى اضرب
وابدا اضرب
علشان انا اللى معتصم يجرى
يااااااااااااااااااااااااااه
انا بدات اصدع
كفاية كده بقى
ايه رايكم ؟؟؟؟

عدالة ... حرية ..... ديموقراطية

كنت قد قررت الابتعاد عن التدوين وفجاة انقلبت الموازين ولم اجد اخطر من ذلك الحادث ليعيدنى مرة اخرى للتدوين تضامنا مع صديقى احمد مصطفى
نتيجة سرد تلك الواقعه هو الان فى المحكمة العسكرية
يحاول النظام ان يغطى فعلته فان كانت تلك جريمة فانا مجرم معه ومتضامن معه فى جريمته
وعلى الجميع نشر تلك النوت لفضحهم اكثر واكثر
علهم يقبضوا علينا جميعا



فضيحة الكلية الحربية - أحمد مصطفى .. المقال اللى ودا صاحبة ورا الشمس


مين يقول عالظلم.....عدل؟؟؟؟؟
قبل القراءه كده الموضوع ده جديد ولسه حاصل في خلال الايام دي احنا النهارده16/2/2009
والاب ده خايف ان الموضوع يوصل للصحافه بس انا قلت انشره هنا حاجه كده علي قدنا
واوعدكم لو رضي ان الموضوع يوصل للصحافه هيوصل زي الصاروخ ولو حد من الصحافه شاف الموضوع هنا ونقله والراجل حصله ضرر يبقي نصيبه كده بقي وربنا يصبره ويقويه علي الظلم والظالمين
الحكاية اللى انا هحكيها دى من صميم جرح بيت مصرى على اد حاله يادوب بيقول ياحيط دارينى

المهم ندخل فى الموضوع على طول
الحكاية هى حكاية مدرس انجليزى كان بيدرسلى ايام ثانوى الراجل ده انا ماشوفتش حد فى اخلاقه ولا فى ادبه بصراحة راجل قمة عنده ابن دخل الكلية السنة دى ولأن ابنه كان فى فريق كورة وكان دايما بيكسبوا ماتشات شاء القدر وربنا كاتبله يدخل كلية الحربية ومن غير وسايط ولا...........كاش من تحت الطرابيزة ولا اى حاجة المهم دخل بمجموعه ومجهوده وكان مرتاح جدا فى الدراسة ومجتهد وكل اساتذته بيشكروا فيه على ادبه واحترامه

المهم ايه الولد ده امتحن امتحانات الترم الاول عادى خالص وتمام على كده

ومن حوالى شهر كده فوجىءاستاذى ان كلية الحربية باعتين له استدعاء فورا

فراح يشوف ايه الموضوع لاقى ظابط بنسر ودبورة( زى مابيقولوا هههههههه)

بيتكلم معاه وبيقولوه ان ابنه عمل مشاغبات وكان عايز يضرب زميله عشان كتاب

ويفاجىء الاستاذ بصاحب النسر والدبورة بيقولوه بل ويجبره انه يمضى على استقالة ابنه من الكلية بحجة ان ابنه غير قادر على الحياة العسكرية وانه مش هينفع يكمل فيها وده كمان لازم يكون فى طى السر والكتمان عشان مايشوشرش على ابنه والا فهيكون بيجنى على ابنه وانهم

ممكن يستقصدوه حتى لو راح كلية تانية

فمن خوف الاب على مستقبل ابنه مضى بكل هدوء وانكسار على استقالة ابنه ومش بس كده لأ وماكفاش صاحب النسر والدبورة كده ده ادعى ان الكلية صرفت على الولد 16 الف جنيه فى الكام شهر دول من بداية الدراسة ومن كرم اخلاقهم وعشان عارفين انه راجل غلبان وعلى اد حاله هياخدوا منه 5 تلاف بس

شوفوا الظلم يعنى موت وخراب ديار

المهم من كتر خوف الاستاذ حاول يدبر المبلغ ويوديه لهم وده طبعا خوفا من الاذية اللى هدده بيها صاحب النسر

طبعا الاستاذ مكلوم الفؤاد هيعمل ايه رجع مكسور الجناح وحاول يشوف حد من الرتب العالية يستفسر عن الموضوع بالظبط وايه اللى حصل

فلما سالوا الاساتذة فى الكلية عن الولد قالوا الولد قمة فى الادب والالتزام ولا غبار عليه

والحكاية ومافيها انهم كانوا عايزين يفضوا مكان فى الكلية لولد تانى ابوه هيدفع فلوس كتير فمالقوش الا الولد ابن الاستاذ الذى لاحول له ولا قوة عشان يلفقوا له تهمة باطلة ويخرجوه من الكلية وفى وقت حرج جدا وبالتالى السنة كده ضاعت على الولد

ومن ساعتها والولد جاتله حالة اكتئاب .........طبعا مفيش اصعب من الظلم

ووالدته تعبت ملازمة للفراشة والبيت اتقلب محزنة

دانا والاستاذ بيحكى الدموع خلاص فرت من عينى وهو بيقول والله لو كان ميتم كان هيبقى اهو

بلدنا وملناش حق فيها

واااااااااااه يابلد من غير صاحب

وبيقول كمان عليه العوض فى الواد اللى حيلتى

وكمان مااقدرش اشتكى وانا ماضى بايديا

(نازل وانا ماشى عالشوك برجليا وانت السبب يا باه يا اللى خليت بيا)

خوفت يأذونا

يعنى هما كتفونا

خلاص ماهو اللى ليه ضهر مايضربش على بطنه فى الزمن ده

والجنيه غلب الكرنيه

والله ياجماعة الموضوع ده كسر فيا حاجات كتير مع انه مش قريبى بس احنا كلنا مسلمين مصريين

الالم فى قلب واحد فينا

جرح لينا كلنا

احنا حتى قعدنا نقوله يصعد الموضوع يشتكى لويز الحربية يمكن يكون لسه فى حد عنده ضمير

ويرجعله حقه.

الموضوع ده من اسمهام زميل وصديق عزيز عليا جدا


ودا كان تعليق عنده فى المدونه
اضيف في 26 يناير, 2010 11:44 م , من قبل تامر من مصر

قسما بالله انت ماتعرف حاجة
وكلامك على الفاضى وانت اصلا ملكش لزمة علشان مافيش حد بيظلم حد وبالذات فالكلية دى وانت لو راجل استنى يومين بس وحتشوف اللى يحصلك
انا عملت برنت للصفحة وحوريك الكلية دى حتعمل فيك
انا حوصله ان شاء الله للكلية